Bu gün 1997-ci il aprel ayının 7-də kəşfiyyat tapşırığını yerinə yetirərkən ermənilərə əsir düşməmək üçün özlərini partladan səkkiz hərbi qulluqçunun (onlardan biri Aqil Əhmədov möcüzəli şəkildə sağ qalıb. Bir il on bir ay erməni əsirliyindən sonra hal-hazırda bizimlədi) II Fəxri Xiyabanda torpağa əmanət edilən gündür.

Bu münasibətlə Dünya Azərbaycanlılarının Qarabağa Azadlıq Hərəkatı (DAQAH) anım tədbiri keçirib. Bu barədə Xeber.İnfo-a DAQAH-dan məlumat verilib.

Anım tədbirini Milli Mədəniyyətin Təbliği ictimai birliyinin rəhbəri, DAQAH-nın Təşkilat Komitəsinin üzvü Jalə Cəfərova açaraq mərasimə toplaşan şəhid ailələrini, ziyalıları, ictimai-siyası fəalları salamlayıb: “Mərasimə toplaşan şəhid analarına demək istəyirəm ki, 1997-ci ildə kəşfiyyata gedən cəsur balalarımız leytenant Ağayev Elxan, leytenant Yarəhmədov Vüqar, çavuş Rzayev Anar, çavuş Həsənov Aqşin, çavuş Ələkbərov Nizami, çavuş Cavadov Fariz, çavuş Əhmədov Aqil tarıx yazdılar. Biz onları unutmadıq və unutmayacağıq. Şəhid analarımızın qarşısında baş əyirəm və demək istəyirəm ki, zalimin zülmü qiyamətə qalmayacaq".

Sonra xüsusi teyinatlı hərbi hissənin komandiri polkovnik Xətayi Baxışov, Güney Azərbaycan Konqresinin sədri Abdulla Əmir Haşimi Cavanşir, şəhid Həsənov Aqşinin anası Xanım Həsənova, DAQAH-in Təşkilat Komitəsinin üzvü psixoloq, dossent Lümunət xanım Əmrahlı, şəhid Vüqar Yarəhmədovun oğlu Vüqar (Vüqar atası şəhid olandan sonra doğulub) çıxış ediblər.

Tədbir Azərbaycan Respublikasının Dövlət Himnin səsləndirilməsi ilə yekunlaşıb.

Tədbir iştirakçıları sonra, dünən dünyasını dəyişən Qarabağ qazisi Etimad Əsədovun dəfn mərasiminə qatılıblar.