Milli Mədəniyyətin Təbliği İctimai Birliyi 26.02.2018-ci il tarixdə Təbrizdə ustad şair Məhəmmədhüseyn Şəhriyyarın ev muzeyində görüş keçirib. Bu barədə Birliyin sədri Jalə Cəfərova Xeber.İnfo-a məlumat verib.
J.Cəfərova ustad şairin ev muzeyində Xocalı Soyqırımının anım mərasiminin təşkil olunduğunu bildirib: “Təbrizdə Xocali Soyqırımını andıq. Tədbirdə dahi Şəhriyarın oğlu Hadi bəy, tələbələr və ictimai xadimlər iştirak edirdilər. Erməni-rus hərbi birləşmələrinin Xocalıda törətdikləri vəhşilikləri əks etdirən kitablar, bukletlər və videoçarxlar hədiyyə edildi. Xocalıdakı vəhşiliklər XX əsrin ən qanlı faciələrindən biridir. Bir gecədə bir şəhər tam olaraq məhv edilib. Əhalisinin böyük əksəriyyəti şəhid olub, itkin düşüb və hələ də ermənilər tərəfdə əsirlikdə olanlar var”.
Birliyin sədri J.Cəfərova Xocalı Soyqırımına hüququ qiymətin verilməməsindən narahatlığını vurğulayıb: “Zaman keçir, hələ də bu vəhşiliyi törədənlər layiqli cəzaların almayıblar. Bu günə qədər girovlarımızdan, itkin düşən yüzlərlə insanımızdan xəbər yoxdur. Buradan bir daha bütün dünyaya səslənirəm –Ermənistan tərəfindən işğal edilmiş Qarabağ və ətraf rayonlarımız Azərbaycanın ayrılmaz parçasıdır və mütləq əcdadlarımızın yaşadığı tarixi, əzəli torpaqarımıza qayıdacağıq”.
Sonda Jalə xanım Cəfərova başda Hadı bəy olmaqla bütün tədbir iştirakçılarına təşəkkürünü çatdırıb.