Lələtəpə savaşının iştirakçısı, Beyləqan rayon sakini, hazırda Beyləqan Hərbi Birləşməsininin N saylı hərbi hissəsinin müddətdən artıq hərbi qulluqçusu Aslanov Azər Əbülfət oğlu ağır xəstəliyinin müalicəsi üçün birinci vitse prezident, Heydər Əliyev Fondunun prezidenti Mehriban Əliyevaya müraciət ünvanlayıb.
Həmin müraciəti təqdim edirik:
"Hörmətli, birinci vitse prezdent Mehriban xanım Əliyeva!
Mən Beyləqan rayon sakini, hazırda Beyləqan Hərbi Birləşməsininin N saylı hərbi hissəsinin müddətdən artıq həqiqi hərbi qulluqçusu Aslanov Azər Əbülfət oğlu Lələtəpə yüksəkliyinin alınmasında fəal iştirakçılardan biri olaraq sizə müraciətlə xəstəliyimin müalicəsi üçün kömək etməyinizi xahiş edirəm.
Bir müddət müalicə aldığım Müdafiə Nazirliyi Mərkəzi Hərbi Poliklinikasında məndən götürülən qan analizində linfa xərçəngi aşkarlandı və müalicə olunmaq üçün Milli Onkologiya Mərkəzinə göndərildim. Ağ ciyərin yaxınlığında yerləşən linfada xərçəng xəstəliyinin mövcudluğu Milli Onkologiya Mərkəzində təsdiqini tapdı və ilkin müalicə üçün lazımı köməkliklər göstərildi. Milli Onkologiya Mərkəzində 5 gün yatdıqdan sonra ikinci müalicəmin davam etdirilməsi üçün evə buraxılmışam.
Milli Onkologiya Mərkəzinin həkimləri müalicə olunaraq yaşamağım üçün maddi vəsaitin gərəkliyini deyirlər. Ancaq 2 övlad atası olaraq ailə vəziyyətimin ağırlığı üzündən müalicə üçün lazımi vəsaiti əldə etməyim mümükün deyil. Hazırda qulluq etdiyim N saylı hərbi hissəsinin yarı qat əmək haqqından başqa gəlir yerim yoxdur. Xəstəliyimlə əlaqədar qulluq etdiyim N saylı hərbi hissədən yaxın günlərdə təxris etdikdən sonra isə müalicəm üçün heç cürə maddi imkan əldə edə bilməyəcəm.
Buna görə də son ümid yerim Ali Baş Komandan cənab İlham Əliyev və sizsiniz.
Azərbaycan Milli Ordusunun hərbi qulluqçusu olmaqdan şərəf duyuram və Ali Baş Komandan İlham Əliyevin rəhbərliyi ilə torpaqlarımızı düşməndən azad edəcəyimizə hər an inanmışam. Kaş içimdəki bu ağır xəstəliyə düçar olmaqdansa vətən uğurunda şəhid olaydım. Ancaq mən ümidimi itirməmişəm və hörmətli prezidentim İlham Əliyevə və sizə olan inamım daim ürəyimdədir.
Sizdən Azərbaycan Milli Ordusunun hərbçisi kimi, vətəndaş kimi, 2 övlad atası kimi xahiş edirəm, ağır xəstəliyimin müalicəsi üçün mənə kömək edin. Həkimlərimiz bu ağır xəstəliyin ölkəmizdə və xaricdə müalicə olunaraq bir müddət yaşamağın mümkün olduğunu deyirlər. Məndə mümkün olduğu qədər yaşayıb torpaqlarımızın işğaldan azad olunmasını görmək istəyirəm. Çünki buna inanıram.
