Azərbaycanda iş adamları bir birinin ardınca ya işlərini  dayandırır ya da sürətlə xaricə miqrasiya edirlər. Artıq ötən  illərlə müqaqyisədə ölkədə iş mühiti əhəmiyyətli dərəcədə  pisləşib. Bununla bağlı münasibət öyrəndiyimiz İqtisadi  Təşəbbüslərə Yardım İB-nin sədri Azər Mehtiyev deyir ki,  vəziyyət həqiqətən də getdikcə pisləşməkdədir: “Əvvəlki illərdə  Azərbaycan biznes mühitinə görə dünya ölkələri arasında 99-cu  yerdə olduğu halda, hazırda vəziyyət kəskin pisləşməkdədir. Son illər üzrə Azərbaycanda biznes mühitinin yaxşılaşdırılması sahəsində ən böyük uğur sayıla biləcək addım biznesin qeydiyyatının vahid pəncərə sisteminə keçididir. Bu addıma görə Azərbaycanın iclahatçı ölkə adlandırılması gülünc idi. Ümumiyyətlə, ”Doing Business"in hesablanması qaydalarının özündə də göstərilib ki, bu indeksdə bir sıra məhdudiyyətlər var. O cümlədən orada qeyd olunur ki, bu indeks hesablanarkən ölkədəki korrupsiya mühiti qiymətləndirilmir. Əgər diqqət yetirsək, görərik ki, Dünya Bankının özünün də həm keçmiş, həm hazırkı rəsmi şəxsləri dəfələrlə bildiriblər ki, Azərbaycan korrupsiyalaşmış ölkədir. Belə bir ölkədə biznes mühitinin yaxşılaşmasından danışmaq gülüncdür".

Ekspertə görə, biznes mühiti üçün ən vacib məsələ mülkiyyət toxunulmazlığına zəmanətdir: “Həm ötən il, həm də cari ildə məhz əhalinin mülkiyyət toxunulmazlığı sahəsində geriyə addım atılıb. Mülki Məcəllədə dəyişiklik edildi və ictimai və dövlət məqsədləri üçün vətəndaşların mülkiyyətdən məhrum edilməsi prosedurları dövlət mənafeyinə uyğun, vətəndaşların mənafeyinə zidd olaraq sadələşdirildi. Üstəlik, ölkədə hər gün iş adamlarının öz obyektlərindən məhrum edilməsi, haqsız həbs olunması, cərimələrin tətbiqi ilə bağlı xəbərlər yayılır. Bütün bunlar biznes mühitinin olmaması, mülkiyyət hüquqlarının pozulmasını əks etdirən göstəricilərdir”.

Son günlərdə ölkə Prezidentinə bir xeyli iş adamı da ölkədə durumun kəskin pisləşməsindən şikayət edərək narazılıq edib. Onlardan biri olan Ceyhun Sovzəliyev deyir ki, "ölkənin biznes mühitində açıq soyğunçuluq hökm sürür. Mənə qanunsuz olaraq 180 min manat borc yazıblar. Harda görünüb ki, aldığın malın qiymətini üstündən 10 gün keçədnən sonra hesablayıb səni soymağa çalışsınlar. Bunlar reket kimi bir şeydir. Nə biznes mühiti? Ölkədə cinayət mühiti var. Heç kimə də şikayət etmək olmur. Heç kim baxmış şikayətə. Kim güclüdür qalanlarını soyur, döyür hətta öldürür. Prezidentə məktub yazmışıq heç baxan da yoxdur. Amma televiziyada deyir ki, guya ölkədə ədalət var, şəffaflıq var. Hanı o ədalət, 180 min manat borc yükləyiblər mənə, hardadır o ədalət" - deyə Sovzəliyev fikrini bildirib.